Qalib Ölkəmizin Qalib Prezidentinin Qalib Qəhrəmanı

Qalib Ölkəmizin Qalib Prezidentinin Qalib Qəhrəmanı
Bu dünyada hər birimiz Tanrı tərəfindən qismətimizə düşən bir ömür payı yaşayırıq. Kimi az yaşayır, kimi çox yaşayır, kimi ona verilən ömür payına az baxır, kimi çox. İnsan ömrünün uzunluğunu isə yaşanmış illərin sayı ilə deyil, onun mənası ilə, əməlləri ilə ölçmək lazımdır.
  İnsanın hamı tərəfindən eyni məhəbbətlə sevilməsi, bu dünyanı tərk etdikdən sonra da hər zaman minnətdarlıq hissi ilə xatırlanması hər kəsə qismət olan xoşbəxtlik deyil. Bu insanlardan biri  də  ömrünün ən  gözəl,  gənclik  çağlarını  vətənin  müdafiəsinə   həsr  edərək  fiziki  sağlamlığını itirən,  qənimət  ömür  yaşayan,  taleyinə  minlərin, milyonların  sevgisi   yazılan,  Azərbaycanda  vətənpərvər, igidlik  simvolu kimi  tanınan Türk dünyasının  qəhrəmanı, Azərbaycanın Milli qəhrəmanı  İbad  Hüseynovdur.  Bu yaxınlarda  Tanrının ona  bəxş  etdiyi   keşməkeşli ömrünün 50 ili geridə qaldı.  
      İbad Hüseynovun adı Vətənlə, torpaqla qoşa  çəkillir. Müharibəni   hərə bir cür yaşayır. Kimin qismətinə köçkünlük, kimin qismətinə şəhidlik, kiminin qismətinə satqınlıq, kimin qismətinə qəhramanlıq düşür. Qəhrəman ömrü yaşamaq da  şansdır hər kəsə nəsib olmur.  Milli  qəhrəman İbad Hüseynovdan  yazmaq  məsuliyyətlidir. Onun döyüş yolu da açıq-aydındır. O döyüşə necə alın açıq girmişdisə eləcə də çıxdı. Müharibəyə girəndə adi bir əsgər idi, müharibədən çıxanda xalqın qəhramanı. Türk Dünyasının fəxri. Taleyində qəribəliklər, möcüzələr yaşayıb. Kəşfiyyatçı olaraq ölüm, məğlubiyyət  anlayışından uzaq biri idi,məğlubiyyəti, uduzmağı qəbul edə bilmirdi. 1993-cü ildə  tank əleyhinə minaya düşərək ağır yaralanır. İllər onu çox  sınağa çəkir. Amma həyat onu bütün sınaqlardan alnıaçıq çıxarır.  1994-cü il oktyabrın 9-da Ulu Öndər Heydər Əliyev İbad Hüseynovu "Azərbaycan Bayrağı” ordeni ilə  təltif  edir.  30 il ərzidəki məğlubiyyəti, vətənsizliyi qəbul etmədi. Bilirdi və inanırdı ki, bir gün  qələbə gününü  qeyd edəcək.  
  2020-ci il, sentyabrın 27-də  elan edilən müharibəni  gözləyirmiş kimi, keçmiş döyüş-kəşfiyyatçı yoldaşları ilə döyüş bölgələrinə üz tutdu. 44 gün ərzində əlində silah, döyüş bölgəsinin  qaynar nöqtələrində oldu, əsgərlərimizə həm mənəvi, həm psixoloji  dəstək   oldu. 
 ” Dünyanın izlədiyi və gözlədiyi siyasi  və  tarixi   məqam. Türkiyənin Qarabağ məsələsində atacağı  addım  tarixi  addım olacaq.Tək Qarabağ deyil, işğal  edilmiş digər ərazilərimizi  də geri  alacağımıza  ümid  edirəm" deyirdi. 2020-ci il həm də "Qarabağın işğaldan azadlığı" kimi də tarixə düşəcəyinə inanıram!” deyərək, ümidlə, inamla  danışırdı. Azərbaycanın güclü ordusu və Ali Baş Komandanımızın güclü  siyasəti nəticəsində  200 illik  qisasımız  alındı. 30 illik həsrətimizə  44 gündə   son qoyuldu. Xalqımızın, Prezidentimizin, Ordumuzun  birliyi Azərbaycanımızı əbədi olaraq  bütövləşdirdi. Bu bütövlük, bu birlik  qızıl həriflərlə tarixə yazıldı. Qalib ölkənin qalib qəhrəmanı olmalıydı İbad Hüseynov.  2020-ci il dekabrın 9-da  Prezidentimiz İlham Əliyevin  sərəncamıyla   İbad Hüseynova Azərbaycanın "Milli  qəhrəmanı”  adı  verildi. Prezidentimizin güclü  siyasəti,  "dəmir yumruğu”  Azərbaycanımızı qələbə  zirvəsinə  çatdırdı.  O  zirvədə hər kəs  anladı  ki, bu millət qorxaq deyil, bu milləti məğlub etmək olmaz. Bu yaxınlarda qələbəmizin  bir  ili tamam  olacaq.Qələbəmiz, birliyimiz mübarək. Qalib ölkəmizin qalib Prezidentinin qalib qəhrəmanı.
 
G.B
RezonansPress.az

Xəbər lenti