Bakı, 12 oktyabr, RezonansPress.az 

Bakı Şəhər Baş Polis İdarəsinin Dövlət Yol Polisi İdarəsi (BDYPİ) yol-nəqliyyat hadisələri ilə bağlı ictimaiyyətə müraciət edib.

İdarənin baş inspektoru, polis mayoru Araz Əsgərli bildirib ki, son illər paytaxt ərazisində yol hərəkəti təhlükəsizliyinin təmin edilməsi istiqamətində xeyli işlər görülsə də, yol-nəqliyyat hadisələrinin statistikasının təhlili vəziyyətin ürəkaçan olmadığını göstərir. Belə ki, 2021-ci ilin 9 ayı ərzində paytaxt ərazisində qeydə alınan 354 yol-nəqliyyat hadisəsi nəticəsində 145 nəfər həlak olub, 284 nəfər müxtəlif dərəcəli bədən xəsarətləri alıb. Hadisələrin 57,1 faizi piyadaların vurulması ilə bağlıdır. Yəni, paytaxt yollarında həlak olanların 93-ü, xəsarət alanların isə 115-i piyadadır. Piyada vurma halı üzrə 24 fakt bilavasitə məhz piyadanın yol hərəkəti qaydalarını pozduğuna görə baş verib. Piyada səhlənkarlığı və sürücü diqqətsizliyi hər il ağır yol-nəqliyyat hadisələrinin baş verməsi və insan ölümü ilə nəticələnir ki, bu da ciddi narahatlıq doğurur.

"Aparılan nəzarət-profilaktik, eləcə də hərəkətin təhlükəsizliyinin təbliğinə yönəlmiş tədbirlərin daha səmərəli və təsiredici olması məqsədilə bütün kütləvi informasiya vasitələrinə, ictimai nüfuzlu şəxslərə, müxtəlif sosial şəbəkə platformasında aktiv olan vətəndaşlara, blogerlərə müraciət edərək xüsusilə piyada təhlükəsizliyi ilə bağlı təbliğat işlərində bizə dəstək olmalarını, daha fərqli və təsiredici metodlarla cəmiyyətin hər bir üzvünün diqqətinin bu məsələlərə yönəlmək işində fəal olmalarını xahiş edirik. Hər birimiz yol hərəkətinin iştirakçısıyıq. Yol hərəkəti təhlükəsizliyinin təminatı aidiyyəti qurumların fəaliyyət istiqaməti olmaqla yanaşı, cəmiyyətin bütün üzvlərinin həyatının bir hissəsidir.

Gəlin, bir-birimizə qarşı laqeyd olmayaq, yol hərəkəti təhlükəsizliyi marafonuna qoşulaq! Bütün gücümüzü səfərbər etməklə həmrəylik nümayiş etdirək! Dövlət Yol Polisi hərəkətin təhlükəsizliyinə dair istənilən təbliğat-təşviqat xarakterli təşəbbüsü öz səlahiyyətləri və imkanları çərçivəsində dəstəkləyir və bu sahədə ictimai məsuliyyət hissinin formalaşdırılmasına töhfə vermək istəyən hər bir şəxsə tam dəstəyini verməyə hazırdır”, - deyə A.Əsgərli vurğulayıb.