"Yer üzərində bütün erməniləri birləşdirən Qarabağ faktoru onlar üçün daha yoxdur"

Azərbaycan dövlətinin apardığı müdrik,balanslaşdırılmış xarici siyasət, qüvvələr nisbətinin düzgün qiymətləndirilməsi bacarığı və paralel şəkildə dünyada hələlik analoqu olmayan XXİ əsr yeni nəsil müharibə texnologiyasına malik ordu quruculuğu vəhdət təşkil edərək, 44 günlük müharibə nəticəsində Ermənistanı tam kapitulyasiyaya məcbur etdi. 5 gün əvvəl Ağdam, bu gün isə Kəlbəcərin öz əzəli sahiblərinə qaytarılması yuxarıda söylədiklərimiz məntiqi nəticəsidir.İşğal edilmiş rayonlar arasında ərazisinə görə ən böyüyü olan Kəlbəcər Ermənistanla sərhəddə çox böyük strateji əhəmiyyətə malikdir. Müzəffər ordumuz Ermənistan və onun işğalçı ordusunu elə bir rəzil günə saldı ki, Kəlbəcər kimi çox çətin relyefə malik rayonu tam təslim etdi. 
   
Tarix təkrar olunur: lakin bu dəfə əks istiqamətdə. Təqvimin az qala hər gününü hansısa yaşayış məntəqəmizin düşmən tərəfindən işğalı kimi yada salaraq, köks ötürmək yetər artıq. Bizim hər bir kədərli günümüzü düşmən sevinclə qarşılayardı. 25 noyabr mütləq yadda qalacaq tarix olacaq: Kəlbəcərin nəzarət alındığı gün kimi. Bəs düşmən tərəf? İndidən sonra bu gün onlar üçün faciəvi tarix sayılacaq. Onlar bu günü həmişə Kəlbəcərin işğalında müstəsna rol oynamış M.Melkonyanın ad günü kimi qeyd edirdilər. Hər il bu gün mütləq Kəlbəcər yada salınardı. Kəlbəcərin işğalı birbaşa bu terrorbaşının adı ilə əlaqələndirilərdi. ABŞ vətəndaşı olan M.Melkonyan dünyada rəsmən  tanınan ASALA terror təşkilatının yaradıcısı və hərəkətverici qüvvəsi idi. Yüzlərlə günahsız insanın qatili olan bu terrorçunun Ermənistan dövləti və cəmiyyəti tərəfindən rəsmən ən yüksək səviyyədə milli qəhrəman kimi qəbul edilməsi erməni həyasızlığının ən bariz nümunəsidir. 
    
Bu gün daha əvvəlki kimi coşğu ilə qeyd edilməyəcək. Qeyd etmək istəsələr, Kəlbəcəri döyüşsüz təhvil verdikləri gün yada düşəcək. Bu işğal faktı artıq aradan qaldırılıb. Qeyd etmək istəsələr, milli qəhrəmanlarının "rəşadətindən” əsər-əlamət qalmadığını, üstəlik şəxsi faciəsi kimi başının bədənindən ayrılmasını yada salacaqlar və bu günü ömürlük faciə kimi qəbul edəcəklər.
  
Qalibləri mühakimə etmirlər. Vaxtilə hərbi uğurları fonunda eyforiyaya qapılan ermənilər müvəqqəti əldə etdikləri qələbəyə qanunauyğunluq donu geyindirərək, özlərini məğlubedilməz sayırdılar.İndisə, acı faciəvi məğlubiyyət erməniçiliyin sonunun başlanğıcı olacaq. Yer üzərində bütün erməniləri birləşdirən Qarabağ faktoru onlar üçün daha yoxdur. Heç şübhəsiz. Erməni cəmiyyətində parçalanmalar baş verəcək, hər bir kəsi lənətləyəcəklər.( O cümlədən hələlik milli qəhrəman saydıqları Monte Melkonyan və onun ölümü barədə əsl həqiqətləri də etiraf edəcəklər.)
 

 Qarabağ Qazisi Sahib Şirinov
 

 
 
 

 

 
 

Xəbər lenti