“Məşğulluq marafonu”na qoşulan işəgötürənlərin sayı artaraq 558-ə çatıb

“Məşğulluq marafonu”na qoşulan işəgötürənlərin sayı artaraq 558-ə çatıb

Bakı, 19 oktyabr, RezonansPress.az 


Vətən müharibəsi şəhidlərinin ailə üzvlərinin və müharibədə yaralanmış qazilərimizin məşğulluğuna dəstək vermək üçün "Məşğulluq marafonu”nda iştirak edən işəgötürənlərin sayı artmaqda davam edir.

Əmək və Əhalinin Sosial Müdafiəsi Nazirliyinin İctimaiyyətlə əlaqələr və kommunikasiya şöbəsindən bildiriblər ki, nazirlik tərəfindən bu ilin iyun ayında başladılan marafona indiyədək 558 işəgötürən (292-si dövlət, 266-sı isə özəl) qoşularaq 3057 vakansiya təqdim edib.

Həmin vakansiyalar üzrə verilən göndərişlər əsasında 906 nəfər (145 şəhid ailəsi üzvü və 761 qazi) işlə təmin olunub. Hazırda da bu kateqoriyalardan olan vətəndaşlara vakansiyalar üzrə göndərişlərin verilməsi davam edir.

"Məşğulluq marafonu”na qoşulmaq istəyən işəgötürənlər vakansiyaları barədə, işlə təmin olunmaq istəyən şəhid ailəsi üzvləri və Vətən müharibəsində yaralanmış qəhrəmanlarımız isə özləri haqqında məlumatları https://dma.gov.az/layiheler/mesgulluq-marafonu linkinə daxil olmaqla qeyd edə bilərlər.

"Qəhrəmanlarımızın məşğulluğuna birgə dəstək olaq!”

Xəbər lenti